Torre dos Moreno
SÍMBOLO ARQUITECTÓNICO DE RIBADEO
Mandado construír polos irmáns Moreno Ulloa, emigrantes en Arxentina, está considerado como un dos edificios máis representativos da arquitectura indiana en Galicia. Foi deseñado polo arquitecto Julián García Núñez e o enxeñeiro Anxo Ardex, discípulo de Antonio Gaudí, que a concibiron en estilo ecléctico pero con claras influencias do modernismo catalán.
Está situada na parte máis alta da vila, no solar da antiga fortaleza. Durante a súa construción espertou gran expectación polo emprego de materiais como o formigón ou o ferro forxado, inusuais na Galicia da época, e admiración pola súa estética e polas súas notables innovacións, tales como o ascensor ou as canalizacións de lixo, que fixeron desta casa un símbolo do progreso indiano.
A súa construción foi finalizada en 1915 e adicouse a casa de rendas, estando ocupada ata finais do S.XX.
Nos seus baixos estiveron o antigo Casino de Ribadeo e a Biblioteca Municipal.Actualmente atópase en proceso de restauración, xa que o emprego de materiais como area da ría fixeron que sufrise unha prematura deterioración.
