Ribadeo
XQSi
Natural, cultural, vivo e próximo
Situado nunha contorna privilexiada, no litoral da Mariña Lucense, Ribadeo é Porta de entrada en Galicia polo Cantábrico. Este destino, de indubidable sabor mariñeiro, evócanos tempos pasados que poderás descubrir percorrendo a súa traza urbana única. Un espazo produto do auxe económico vivido nos séculos XVIII -da man do comercio marítimo- e principios do século XX -a través das innovacións importadas polos seus emigrantes retornados de América-, que lle achegan carácter e espírito propios e de gran singularidade.
Un dos períodos máis importantes da historia do noso municipio, é o século da Ilustración (s. XVIII). Nese momento, o porto comercial de Ribadeo alcanza un dos postos de maior importancia no Cantábrico hispano. Causa e efecto diso, é que moitas familias de comerciantes e armadores doutras localidades de Asturias, Galicia e País Vasco principalmente, se asentan nesta vila, transformando a súa fisionomía, coa construción de “pazos” urbanos que se recoñecen actualmente polos seus famosos “ gurugús” ou miradoiros.
A importante pegada deixada polos emigrantes transoceánicos retornados, coñecidos como “indianos”, converte a Ribadeo no municipio galego co maior número relativo de vivendas indianas. Da súa man, a nosa histórica vila viviu unha época de auxe económico, social e urbanístico. Estes importaron unha arquitectura cosmopolita que se inseriu de forma rechamante entre as casas tradicionais para simbolizar o triunfo e o éxito conseguido fóra.
As súas son vivendas cómodas, amplas, abertas ó exterior, con novas formas e materiais que falan de riqueza, sofisticación e novas formas de vida urbanas, con elegantes adornos nas fachadas, xardíns exuberantes e con reminiscencias tropicais.
Ademais do noso rico patrimonio cultural, Ribadeo destaca internacionalmente polos seus recursos naturais e paisaxísticos: unha reserva da Biosfera “Río Eo, Oscos e Terras de Burón”; dous espazos encadrados na Rede Natura 2000 ZEC Ría de Ribadeo e ZEC As Catedrais; unha Zona de Especial Protección de Aves (ZEPA) e Humidal protexido (RAMSAR): Ría de Ribadeo; e un Monumento Natural, a Praia das Catedrais. Todos eles permitiranche gozar e desconectar da rutina diaria.
Estamos tamén, ante un paraíso para a práctica de todo tipo de deportes ó aire libre: sendeirismo, BTT, ecoturismo, paseos en barco, surf, kitesurf, canoas, piraguas, parapente, son algunhas das moitas actividades que Ribadeo ofrece para coñecer os seus espazos naturais dunha maneira singular e respectuosa co territorio.
Ir de compras e facer turismo é todo un, non tes que elixir. Nesta pequena cidade, cada recuncho che ofrece unha tenda ou establecemento que define o seu día a día e o seu dinamismo comercial. Mentres que fas as túas compras poderás descubrir os barrios e espazos máis pintorescos, así como algunha das rúas máis tradicionais.
Ademais, Ribadeo ofrece unha ampla oferta cultural de calidade e aberta a tódolos visitantes. Un lugar vivo, con terrazas, restaurantes, bares e pubs que seguro farán a túa estancia máis animada e divertida.
En definitiva, un lugar para vivir e sentir.
