Casa de Sela
Construída por José González Sela e datada en 1869, é unha das construcións indianas máis antigas de Ribadeo.
De estilo ecléctico, o seu impoñente volume, a sobriedade decorativa e o emprego de cantería de granito, remiten á arquitectura tradicional, tanto institucional como privada, que se desenvolveu na Galicia dos séculos XVIII e XIX.
Os datos existentes indican que se trata dunha réplica da vivenda que o promotor posuía en México, pero isto refírese, sen dúbida, ó corpo principal: non é fácil de crer que as galerías lateral e posterior viñesen de alí salvo que previamente viaxasen naquela dirección. O mesmo poderiamos dicir dos pequenos pináculos que adornan o tellado, elementos propios do rural da costa setentrional galega.
Máis universais son os balaústres e os vasos que coroan as pilastras, pero máis locais son as lousas coas que se cobre a edificación.
O xardín da casa acolle a típica vexetación indiana, onde non falta a emblemática palmeira.
