Rúa Rodríguez Murias
Esta vía atesoura, sen dúbida, varias das edificacións máis representativas non só da arquitectura indiana senón tamén do auxe e expansión da vila. A denominación da rúa é unha homenaxe a un dos indianos máis significativos e influentes de Ribadeo: Jesús Rodríguez Murias, nacido na localidade pesqueira de Rinlo.
Falecido en 1909, legou á súa parroquia e á vila de Ribadeo un importante capital para que fose empregado en obras benéficas e de carácter cultural, entre as que destacan a construción da traída de auga potable e a escola de Rinlo.
Hoxe, a rúa Rodríguez Murias, no eixo coñecido popularmente como “as Catro Calles”, constitúe o corazón comercial da vila.
