Vivenda de Dona Esperanza Leiras
A promotora, Esperanza Leiras e López, ordenou a súa edificación en 1886. O inmoble presenta dous elementos moi característicos da arquitectura indiana: o soportal, que avanza e protexe a entrada principal e o «gurugú» ou miradoiro acristalado, que coroa o tellado e ó que se afeccionaron numerosos comerciantes ribadenses dos séculos XVIII e XIX.
Na planta baixa os vans aparecen enmarcados por un recercado que debuxa senllos botóns florais no encontro de xambas e dinteis; á altura da clave disponse unha coroa laureada que encerra un rostro feminino de maior relevo.
Na primeira planta os vans permiten o acceso a un gran balcón que se alonga na rúa central e que descansa sobre dous esveltos piares de ferro que conforman o soportal de acceso á planta baixa. Tanto xambas como dinteis exaltan a súa presenza con motivos florais e xeométricos. Na segunda planta os tres vans dan acceso a balcóns balaustrados de escasa profundidade que descansan sobre modillóns torneados.
