Casa do Óptico
Este edificio, xunto a un antigo acceso á vila, foi construído a principios do S.XX polo óptico Pedro García, seguindo os ditados do estilo indiano. Así, por exemplo, está coroado polo tradicional gurugú ou miradoiro, que identificará as casas de comerciantes e armadores dos séculos XVIII e XIX en Ribadeo e que foi asimilado pola arquitectura indiana.
Na súa fachada principal, destacan a escalinata, flanqueada por dous camelios, e o balcón presidencial da primeira planta.
No xardín consérvanse as acacias, palmeiras e araucarias plantadas hai máis dun século e que caracterizan os xardíns das casas indianas. Actualmente alberga a Escola Oficial de Idiomas.
