Barrio de San Roque
É o barrio indiano por excelencia. A maioría dos primeiros emigrantes que regresaron a Ribadeo, na década de 1870, construíron as súas vivendas nesta zona que por aquel entón era o arrabalde da vila.
Trátase de casas amplas, en comparación coas habituais da época, con xenerosas ventás e formas que chocaban coa sobriedade estilística da construción popular do XIX galego. Os recentemente chegados adornaban as fachadas, rodeaban as súas casas de xardíns (non hortas), instalaban valos e cancelas de ferro forxado e labraban formas decorativas na madeira dos portóns. Os promotores impuxeron criterios e gustos habituais en Bos Aires ou A Habana, e mesmo importaron detalles e ideas da xa entón mitificada cidade de París.
Hai edificacións indianas a ámbolos dous lados da rúa San Roque. Algunhas son exuberantes, outras sinxelas, pero todas se inspiran en modelos arquitectónicos de moda en América. Houbo propietarios que adaptaron as súas propostas ás indicacións dos construtores locais, incluíndo por exemplo balcóns singulares. Algunhas destas antigas fachadas foron alicatadas a partir dos anos sesenta do século XX, cando o azulexo foi publicitado como o illante idóneo para evitar que a humidade exterior minase os muros e penetrase nas vivendas.
