Vivenda de Dona Ascensión Pillado
Esta casa foi custeada por Ascensión Pillado e Pedrosa en 1888. A fachada remite ós pazos urbanos do centro histórico xa que do mesmo xeito que eles, está inspirada na arquitectura tradicional galega: xogos de simetría con balcóns e xanelas, marcos de cantería de granito, cornixa finamente labrada, ou a existencia das chamadas «portas de aire» (balcóns nivelados coa fachada). Con todo, o fermoso traballo de forxa advirte de que a súa dona non era allea ás tendencias artísticas do momento.
O edificio consta de tres plantas. Todo oco ou bordo está recercado de granito: zócalo, bordos de ocos, esquinal, cornixa; faixas e modillóns seguen a mesma tónica material. Os balcóns e antepeitos son de pezas metálicas fundidas. As carpinterías, xanelas e portas-balcón de madeira pintada.
Nobreza e sobriedade son as características que definen esta edificación: nobreza, polo uso do perpiaño e a agradable composición das fachadas; sobriedade, pola ausencia de floreos. Con todo, a sobriedade do exterior tórnase nunha espléndida decoración cromática, material e formal no interior.
