Casa dos Ananos
Era a residencia de Antonio Fernández e Alejandra Higueras, emigrantes en Rosario (Arxentina) que fixeron fortuna no sector téxtil. A casa debe o seu nome ó alcume familiar.
Este inmoble é un exemplo típico de construción inspirada en elementos autóctonos, reflectidos, por exemplo, na torre cadrada (que lembra á dos pazos) e na sobriedade decorativa. Con todo, incorpora formas e tendencias modernas, como son o xardín ou a apertura cara ó exterior con grandes xanelas e balcóns.
Os pináculos da torre, os fortes beirados, o emprego de cemento nos balcóns, o aspecto de solidez que lle outorgan os volumes octaédricos, o zócalo de cachotería, a sobriedade das cores e outros detalles, contribúen a demostrar o éxito, o poder, a seguridade e a estabilidade económica que numerosos indianos querían deixar patente coas súas casas.
Nesta casa gárdase un dos legados indianos máis curiosos que existen. Trátase dun mural pintado nas paredes do comedor que evoca visualmente a memoria da emigración. Son cinco paneis que narran a peripecia vital de Antonio Fernández dende a súa marcha ata a súa chegada e establecemento en América.
O autor dos murais foi Ramón Fernandez Higueras, coñecido como «Moncho dos Enanos» e nado en Rosario (Arxentina). Fillo da emigración, viviu en diferentes etapas da súa vida entre Arxentina e Ribadeo.
Era un gran afeccionado á pintura, e nunha das súas longas estancias en Ribadeo realizou no comedor da casa un gran mural adicado ós seus pais emigrantes. Posiblemente sexa un mural único en Galicia, onde queda plasmada a emigración.
