Atalaia
É un dos puntos máis emblemáticos do centro histórico da vila. Dada a súa localización estratéxica -nun promontorio sobre o porto- este lugar foi utilizado en tempos medievais para guiar ós navegantes por medio de fogueiras. En 1542 constrúese aquí un baluarte defensivo para dotar dunha maior infraestrutura defensiva á vila co obxectivo de defendela de ataques de piratas e corsarios holandeses e ingleses que, atraídos pola actividade comercial da ría, facían periodicamente algunha incursión.
O baluarte pasou a integrar o sistema defensivo da vila que compoñían a Fortaleza, a muralla, o Forte de San Damián e a Torre Vella.
Cara a mediados do século XVIII, o baluarte de Atalaia foi abandonado e hoxe só se conservan dous canóns de ferro traídos de Andalucía.
CAPILLA DE ATALAIA
Trátase dunha das capelas máis antigas de Ribadeo, construída no século XII sobre tramos da antiga muralla. Neste templo, consagrado á Santísima Trindade, reuníanse os gremios e celebrábase o “Concello Aberto”, que consistía nunha asemblea xeral de veciños electores cada 1 de xaneiro.
Co paso do tempo, a capela tivo varias reformas. Hoxe conserva a porta principal gótica do século XIV con decoración en zig- zag e dúas cabezas humanas nos extremos. Sobre a porta atópase o escudo de armas da vila. No seu interior conserva tres retablos. O maior, do século XVIII, pertenceu á antiga Colexiata de Santa María. Contén a imaxe da Santísima Trindade.
