Praia de Esteiro
O litoral ribadense caracterízase pola súa infinidade de entrantes e saíntes que forman pequenas praias, un claro exemplo é esta praia, unha das máis singulares pola súa orografía en forma de arco.
A súa situación favorable ante os ventos da zona, fai que a súa afluencia sexa das máis altas durante os meses de verán.
A súa ondada é moderada aínda que segundo a marea é posible ver cubrirse toda a praia polo mar. Está composta de rocha e area branca.
Está illada, pero dispón de aparcamento xunto á estrada costeira e é de fácil acceso. Dispón de servizos básicos: servizo de socorristas, vestiarios, duchas, papeleiras e limpeza no verán.
Hai que ter moito coidado con achegarse á base dos cantís, a costa é moi activa e poden ocorrer desprendementos de rochas.
A praia de Esteiro forma parte do Monumento Natural de As Catedrais.
