Porto Deportivo
O porto de Ribadeo ten dúas partes ben diferenciadas: o porto deportivo de Porcillán e o peirao comercial de Mirasol.
O porto deportivo, pertencente á Xunta de Galicia, é xestionado polo Real Club Náutico de Ribadeo e conta con 622 amarres. Ten escola de vela e organiza actividades subacuáticas e de pesca deportiva.
É un magnífico lugar para contemplar a ampla Ría de Ribadeo, a ponte dos Santos (que comunica ámbalas beiras) e as poboacións asturianas de Figueras e Castropol. Vistas que melloran subindo á próxima capela de San Miguel.
Tanto esta zona, de Porcillán, como a de Cabanela foron a orixe de Ribadeo. No auditorio ao aire libre de Cabanela aínda quedan os restos do que foi o palacio do bispo Paio Cebeira, do século XIII.
A outra parte do porto é o peirao comercial de Mirasol, onde se realizan as cargas de mercadorías. Principalmente, pasta de papel procedente da factoría de ENCE-Navia. A súa produción é dunhas 400.000 toneladas anuais, que converten a este porto nun dos principais de Galicia. Ademais, son habituais as cargas de madeiras de piñeiro, eucalipto, caolín ou magnesita.
