Castro de Meirengos
A cultura dos castros é a manifestación característica da Idade do Ferro na Gallaecia (Galicia, parte de Asturias, León e norte de Portugal), con continuidade dende o século VIII a. de C. ata o século IV da nosa era. Soamente na provincia de Lugo a Xunta de Galicia ten documentados 1075 castros.
Este castro sitúase á ribeira do mar Cantábrico e dista 200 metros do pobo de Meirengos, dentro da parroquia da Devesa. Ten forma ovalada e unha superficie de 1 hectárea. Na súa parte occidental hai tres fosos, os cales están xa bastante esvaecidos por movemento de terras.
O resto das defensas non se conservan, pero na zona dos cantís hai un muro que debe ser herdanza das defensas orixinais.
