Castro de Fornelos
Localízase na franxa costeira da parroquia de San Xoán de Piñeira e preto da poboación de Outeiro, nun promontorio elevado entre 10 e 15 metros sobre o nivel do mar. Ao norte sitúase a Illa do Castro, separada por un estreito brazo de mar ou rochedo, dependendo da marea, do castro.
A situación do castro de Fornelos e a súa unión con terra firme a través dun estreito istmo, de apenas 30 metros, facilitaba a súa defensa, xa que era unicamente neste flanco sur onde se precisaba de estruturas defensivas artificiais.
Entre os restos aparecidos e documentados deste castro hai fragmentos, tanto de cerámica común indíxena como de sigillata.
A economía dos seus poboadores seguramente se baseaba na pesca e o marisqueo, complementada con actividades agrícolas e gandeiras.
