Se os denominados «indianos», emigrantes retornados das américas, que fixeran fortuna adoitaban edificar a súa casa para demostrar o seu éxito ante os seus paisanos, algúns tamén achegaban capital para sufragar obras en beneficio do seu pobo.

Este é o caso de Don Jesús Rodríguez Murias, que legou importantes cantidades tanto a Rinlo, a súa parroquia, como a Ribadeo. Foi o benfeitor que conseguiu a traída de augas a Ribadeo, a construción da escola de Rinlo e a fonte que se pode ver nesta área recreativa.