Ribadeo
A pegada relixiosa
Ribadeo é unha vila con máis de mil anos de historia, aínda que será a partir do século XII da man do rei Fernando II cando comece o verdadeiro desenvolvemento da súa poboación.
Na súa consolidación como burgo xogou un papel destacado a Igrexa, chegando a ser a nosa vila sede episcopal durante un breve período de tempo co bispo Pelayo de Cebeira (1199 a 1218), ata o seu retorno a Villamaior de Brea, que adoptou o nome de Mondoñedo. Segundo a tradición, a antiga sede episcopal estivo en Cabanela e desta sede aínda se conservan unhas ruínas.
Ós poucos fóronse engadindo elementos característicos do ámbito urbano como a antiga Colexiata de Santa María (hoxe desaparecida) ou os conventos de San Francisco e Santa Clara
CONVENTO DE SANTA CLARA
Orixinariamente era un beaterio no século XI, transformándose en convento no século XIV. No século XVI declarouse un voraz incendio, o que conleva a súa reconstrución, trala cal a súa situación mellorou considerablemente, chegando a ser no século XVIII un dos mellores templos da provincia. A comunidade que congregaba era posuidora de importantes rendas.
IGREXA PARROQUIAL DE SANTA MARÍA DO CAMPO
Pouco queda xa do tempo medieval que existiu ata a desamortización de Mendizábal. O antigo Convento de San Francisco foi fundado, segundo a tradición, por Francisco de Asís durante a súa peregrinación a Compostela en 1214, ó chegar ata aquí por ser Ribadeo sede episcopal. Trala desamortización reconverteuse en parroquial pasando a chamarse Igrexa de Santa María do Campo.
CAPELA DA ATALAIA
A capela, de carácter medieval e situada sobre tramos das antigas murallas, foi erixida no século XII, o que a converte no templo máis antigo da localidade, aínda que o seu pórtico é do século XIV e sufriu varias reformas no transcurso dos séculos, nunha das cales se tapiou a porta que se abría sobre a Atalaia.
Doutra banda, O Camiño de Santiago do Norte ten en Ribadeo uno dos seus fitos sinalados. Devotos procedentes non só de terras asturianas, senón tamén de todo o norte da península, e mesmo do norte de Europa entraban en Galicia cruzando o mar Cantábrico a través da fermosa ría de Ribadeo. É a nosa histórica vila porta de entrada e punto de partida en Galicia da ruta xacobea, deixando por iso un importante legado hospitalario vinculado á peregrinación cara a Compostela e templos tan importantes como o Santuario da Nosa Señora das Virtudes no lugar da Ponte (Arante).
A orixe deste templo data de finais do século XIV e conserva un rico patrimonio en pinturas murais tardo-medievais, así como un singular exvoto pintado que relata a intervención milagrosa da Virxe a favor do navío Santa Catalina, en 1595.
