Espazos Singulares
A natureza do municipio ribadense é plural, engloba tres mundos: o de interior, a rasa costeira e a liña de costa, cuxo epicentro demográfico é o poboado marisqueiro e outrora baleeiro de Rinlo; litoral no que se alternan praias e cantís nos que o mar labrou calas, furnas, covas e arcos como os da praia das Catedrais.
No interior do territorio destacan verdes vales de perfil suave de leste a oeste, os bosques, cultivos e praderías de Ove, Vilausende, Couxela, Covelas, Cedofeita, Arante e Remourelle; un espazo cunha paisaxe única que ofrece unha gran variedade de recursos de tipo cultural e natural que achegan ó visitante os encantos máis agachados do corazón do noso municipio. Miradoiros con vistas espectaculares, pazos e casas señoriais e paisaxes naturais de gran beleza.
Rinlo é un porto de orixe medieval creado nun dos poucos entrantes propicios para iso desta costa: a enseada da Areosa. Trátase dun porto tradicional de pesqueiros. Mostra disto é a súa confraría de pescadores, unha das máis antigas de España.
Importante é o seu pasado marisqueiro. Sobre o ano 1904 comeza a funcionar en Rinlo unha cetaria natural destinada ó cultivo de lagosta e centola, levantada sobre unha zona da costa onde unha lingua de mar entra nas rochas e constrúe unha pequena piscina natural e zona de abrigo. Poucos anos máis tarde entran en funcionamento as outras dúas cetarias coas que conta Rinlo.
Ademais, cada ano esta vila, celebra a Festa do Percebe en xullo ou agosto, en función das mareas, coa degustación dese e doutros mariscos.
