Un pouco máis adiante chegamos á enseada da Vella onde as rochas da zona, cuarcitas e lousas dunha formación xeolóxica de máis de 450 millóns de anos, mostran unha disposición en forma de arco, como unha letra C. Estamos no que se denomina zona de charnela, zona de máxima curvatura dun pregue, un enorme pregue que comeza na Ría de Foz e se estende ata a Ría de Ribadeo. Esta estrutura orixinouse fai máis de 350 millóns de anos, momento no que chocaron dous grandes supercontinentes: Laurussia e Gondwana.