Castro dos Castros
Estamos ante un castro situado nunha punta costeira. O xacemento conta con boas defensas naturais, ao N, E e 0 , constituído polos propios cantís rochosos. Polo S deféndese mediante un parapeto que alcanza uns 3 metros de altura. Pola parte exterior deste parapeto e coa súa mesma disposición discorre un foso, de considerable anchura e que na actualidade atópase moi recheo mediante sedimentación de materiais transportados pola auga.
Descoñécese a conformación orixinal do xacemento castrexo, especialmente a do seu interior, debido ás importantes alteracións provocadas pola construción dunha vivenda no seu centro. Nos illotes rochosos que se sitúan ao N deste recinto existen referencias sobre a aparición de restos materiais antigos, que poderían formar parte do xacemento orixinal.
Apareceron neste castro importantes achados, tanto de restos materiais (cerámica común romana, terra sigillata e moedas baixo-imperiais) como de estruturas (tumbas de inhumación).
