Casa de
El Viejo Pancho
Para coñecer a pegada indiana é obrigado deterse na casa onde naceu o escritor José Mª Alonso Trelles e Jarén, en 1857, máis coñecido polo apelativo de «El Viejo Pancho».Trelles emigrou á Arxentina, aínda que acabou afincándose na veciña República Oriental do Uruguai, onde exerceu o xornalismo e se converteu nun apaixonado da cultura gaucha.
Na súa obra literaria, propia dun bardo que canta as virtudes das xentes coas que convive, reflectiu o sentir da sociedade que o acolleu, e fíxoo con tan alto grao de identificación que na América austral está considerado un dos escritores máis representativos das letras uruguaias e, sobre todo, do sentir dos gauchos que habitan as pampas do cono sur americano. A súa obra máis coñecida é “Paja brava”, publicada en 1916. Na actualidade, a casa natal de El Viejo Pancho alberga o Centro de Estudos Iberoamericanos, así como a Delegación Municipal de Cultura.
