Praza dos Catro Canos
A “Praciña dos Catro Canos” é quizais o espazo máis auténtico da zona vella de Ribadeo. Nela, parece que o tempo se detén.
O Centro Histórico de Ribadeo, declarado Ben de Interese Cultural en 2004, ocupa unha superficie de máis de 40Ha e sitúase no centro urbano da vila, en contacto coa costa e co porto. As súas rúas concentran un gran número de edificios destacables como casas de indianos, vivendas de familias de armadores e outras casas blasonadas xunto a casas populares de artesáns e mariñeiros.
TRAVESÍA FERNANDO III O SANTO
Rodeada de vivendas tradicionais, a praza está bordeada nun dos seus lados pola travesía Fernando III o Santo, que presenta unha liña de vivendas antigas. Noutra esquina da praza, moi próxima ó Pazo de Miranda, situábase o cárcere. No centro da praza atópase a “Fonte dos Catro Canos” , construída en 1849.
FONTE DOS CATRO CANOS
De planta circular, na súa parte central sobresae, terminada nun pináculo, unha columna da que saen catro canos. Na súa parte inferior, unha reixa de ferro era o lugar onde se colocaban as sellas e outros recipientes para enchelos de auga.
As fontes foron sempre lugar de convivencia e contacto social; mostra desta maneira de vida xovial e aberta das nosas terras son as 124 fontes que existen en Ribadeo.
