Porto de Porcillán
A evolución da vila de Ribadeo está intimamente relacionada co seu porto. A existencia do núcleo urbano remóntase polo menos ó século IX, época dende a cal está documentada a existencia de dúas aldeas de pescadores ó redor de Cabanela e Porcillán. A partir da Idade Media, o porto de Porcillán desenvólvese, impulsado pola actividade comercial, chegando a converterse nun dos portos máis importantes da costa cantábrica.
Aínda con todo, non existirá peirao ata o s.XIX. En 1833 arránxase o peirao e a rampla de Figueirúa. Por entón, a descarga e abastecemento dos buques facíase botándose os traballadores ó mar, nun duro e pesado traballo. A mercadoría era recollida polas casas receptoras e transportada en carros ata a vila. Recentemente en 1903, tras anos de xestións, habilítase un novo peirao para o embarque de ferro, carbón, graxas, aceites minerais e demais produtos para os que a Aduana local estaba habilitada.
Hoxe, o Porto de Porcillán é un dos catro portos deportivos con Bandeira Azul que existen en Galicia e o único da provincia de Lugo. Situado nun enclave privilexiado, resulta ideal para a práctica de todo tipo de deportes náuticos e subacuáticos. É tamén un espazo utilizado para o lecer de maiores, novos e pequenos, xa que ofrece numerosos atractivos, como o seu paseo marítimo, a súa oferta de restaurantes e un amplo abano de actividades, como o alugueiro de embarcacións, paseos en lancha de pasaxe ou a práctica de diversos deportes.
Xestionado polo Club Náutico Ribadeo, fundado en 1974, o porto foi incrementando notablemente os seus servizos e instalacións a partir dos anos noventa, o que trouxo consigo unha afección cada vez maior na zona pola navegación, vela e pesca deportiva.
Conta con 900 socios e dispón de 641 amarres dos que 28 son reservados para tránsitos. Un dos seus clásicos é a celebración da “Semana Náutica”, organizada no mes de agosto, durante a que se realizan regatas a vela, concursos de mergullo, concursos de pesca e actividades para o público en xeral.
Contacto:
Club Náutico Ribadeo, Puerto deportivo de Porcillán s/n
27700 Ribadeo
Teléfono: 982 120 428
