Pazo de Ibáñez
Este pazo de estilo neoclásico foi mandado construír por un dos personaxes máis relevantes da historia de Galicia no século XVIII, Antonio Raimundo Ibáñez -Marqués de Sargadelos-, para alberguar alí a súa residencia habitual. Ibáñez foi o gran impulsor do porto comercial de Ribadeo.
O edificio, de planta rectangular e dobre altura máis bufarda, está fabricado en sillería granítica e con cuberta de lousa a catro augas, cun soportal de cinco pilastras na fachada principal e con catro balcóns de frontóns triangulares. A balaustrada do balcón, de estilo isabelino, foi realizada na Real fábrica de Sargadelos cando esta era fundición. Sobre os balcóns pode verse un escudo de armas de Ribadeo.
Trala morte de Ibáñez en 1809, a familia é detida e levada a Figueiras, polo que a casa sufrirá diferentes saqueos, sendo utilizada durante un tempo como cuartel, e mesmo como cárcere. Avanzado o século XIX, a casa é comprada polo comerciante Antonio Casas, pasando a coñecerse como “Casa de Casas” ou “Casa de Arriba”. Finalizada a guerra civil, é adquirida polo Concello, instalándose aquí dende entón a sede municipal.
