No medio da rúa atopamos unha fermosa casa blasonada, cuxo escudo aparece datado en 1616. Polas armas e as divisas podería tratarse do brasón dun nobre, mesmo dun rei, pero non hai constancia da presenza naquela época de ningunha familia destas características en Ribadeo. Naqueles anos, o porto de Ribadeo era de vital importancia para todo tipo de buques, que atopaban nesta ría tanto o abastecemento necesario para as súas travesías como refuxio fronte ós temporais ou os ataques de piratas e corsarios, frecuentes naqueles tempos.