Vexetación
O toxo de nome científico “Ulex europaeus” é un arbusto espiñento da familia das leguminosas. É propia do oeste e suroeste de Europa, pero o seu carácter invasor e colonizador noutras rexións da Terra, como ocorre en Chile, faille ser considerada unha das 100 peores especies exóticas invasoras do mundo.
Alcanza alturas de ata 2,5 metros, medra de forma moi ramificada e enmarañada. Florece de decembro a xuño, aínda que baixo condicións óptimas pode facelo durante todo o ano. Os seus requirimentos pasan por asentarse en chans silicícolas, principalmente acedos, precisa de temperaturas suaves e humidade ambiental abundante, o que indica preferencia por climas de influencia marítima e chuviosa.
En Galicia forma extensas matogueiras, en ocasións asociados a breixos. Ao ser unha especie pioneira e colonizadora, e soportar ben os chans pobres, estendeuse moito en toda a cornixa cantábrica e atlántica.
Ademais, viuse favorecida polos abundantes incendios, xa que é unha especie pirófita, é dicir, responde bastante ben tras un incendio, pois rebrota de raíz e vese favorecida na xerminación das súas sementes.
