Praia das Catedrais
Para visitar esta praia é imprescindible acudir en marea baixa, cando o mar en retirada dá o seu permiso momentáneo para iniciar o percorrido. Para ver as formacións rochosas máis espectaculares, debemos camiñar uns 600 metros á dereita unha vez baixamos as escaleiras de acceso, adentrándonos así nunha máxica paisaxe de grandes illotes, covas, furnas e bufadoiros produto da erosión mariña ao longo do tempo.
Aínda que as formas que derivan deste peculiar encontro entre o mar e o continente sexan as protagonistas, non se debe pasar por alto a riqueza que este lugar posúe no que se refire á súa flora e fauna, propias da costa Atlántica, especies que tiveron que adaptarse ás extremas condicións ambientais do lugar. Así, a “herba de namorar”, o fiúncho de mar, o toxo ou o breixo forman parte da vexetación terrestre da zona. No que respecta á vexetación mariña destacar as algas vermellas e algas coralináceas incrustantes que, xunto cos liques, modifican o aspecto orixinal dos cantís.
Sobrevoan asiduamente este espazo a gaivota; picoteando a beira do mar é común atopar o pirlo e nadando e mergullándose obsérvase o corvo mariño grande, que dá nome ás abundantes penas Corveiras da zona. Estacionalmente é posible contemplar, entre outras, a garzota ou a abubilla chegadas coa primavera, ou asistir ao paso de aves mariñas migratorias como o alca ou o mascato.
Por último, no referente á fauna mariña sobresae a presenza de percebes, mexillóns, lapas, caramuxos e landras de mar.
