Forte de San Damián
A construción orixinal do forte data do ano 1624, e promoveuno o Marqués de Cerralbo. O seu emprazamento na embocadura da ría permitíalle controlar o paso de embarcacións e defender a ría de posibles ataques. De feito, xa nesta mesma localización existiu unha torre denominada Torre Nova.
No ano 1719, debido a unha incursión dos ingleses, foi destruído.
Un novo castelo edificouse en 1774 polos enxeñeiros Verxel e Arrol, dotándoo con canóns traídos dende Sevilla. O seu coidado, dende entón, estivo en mans tanto dos soldados como da poboación de Ribadeo, que se alternaban nas gardas.
Unha vez máis foi destruída a fortaleza no ano 1809, nesta ocasión, a mans de tropas napoleónicas, quedando moi afectada xa que voaron a polvoreira.
Actualmente, tras a súa restauración, conserva os seus muros, o foso, os contrafortes e as troneiras; no seu recinto interior hai unha sala de exposicións do Concello de Ribadeo.
Tamén se atopa no seu interior unha embarcación de salvamento que foi “arrestada”, é dicir, castigada, a non saír ao mar. Isto débese a que na primeira intervención que realizou morreron afogados varios mariñeiros.
