Costa
Descubre as nosas praias
As praias de Ribadeo, xunto coa súa costa, son un dos principais atractivos deste municipio.
Cada unha delas ten a súa personalidade: As Catedrais é a máis coñecida, Esteiro e Illas as máis familiares, Os Castros a máis ampla e surfista; e a máis abrigada, a praia de Rochas Brancas, e gozan todas elas de bos servizos para os bañistas.
Na costa desenvolvéronse formacións xeomorfológicas de gran beleza.
Dende a Illa Pancha, no leste, ata o límite co municipio de Barreiros, no oeste, o litoral ribadense convértese nunha infinidade de entrantes e saíntes.
Entre os primeiros predominan as praias recollidas, como as de Rochas Brancas, Xuncos, As Illas, Os Castros e Esteiro, ou pequenas enseadas rochosas como A Insua, Arnela, Loureiro, Coedo, Areosa, Cegoñas ou Cabalar, en ocasións cubertas de cantos rodados e que poden pasar desapercibidas se o visitante non se achega o suficiente á beira do mar.
Entre os segundos destacan numerosos saíntes, auténticos aguillóns que se incrustan no mar como o Penedo da Insua, Penedo do Corvo, Punta Corveira, etc.
RUTA DAS PRAIAS
Esta ruta segue a liña do litoral ribadense e permite coñecer ó seu paso a sucesión de entrantes, saíntes, praias recollidas e enseadas rochosas que o identifican e que o converten nun espazo natural protexido e catalogado como Rede Natura. Parte de Rinlo, unha pequena vila que ten a súa orixe nun porto baleeiro de máis de 500 anos de historia. Dende aquí, o camiño continúa cara á praia de Xuncos, un pequeno areal de aspecto rochoso e con cantís abruptos, de area fina e branca, para seguir cara á praia dos Castros, a praia máis emblemática de Ribadeo despois das Catedrais.
A ruta continúa cara á praia das Illas, que se expande entre un conxunto de pequenas illas e a costa, constituíndo unha paisaxe moi digna de contemplar. Esta praia, con marea baixa, únese á dos Castros deixando ao descuberto un paseo pola area entre pozas, rochas e cantís.
Seguindo a sinalización do roteiro chegarase á praia de Esteiro, unha das máis singulares pola forma da súa enseada en forma de arco que se alonga cara o mar.
Finalmente, chégase á praia de Augasantas, un espazo único e de extraordinaria beleza.
