A escasos metros cara o Oeste chegamos ao Porto de Rinlo, fermosa enseada de orixe natural, xerada por unha intensa e salientable rede de fracturas que o mar aproveitou para erosionar de xeito máis intenso.
Porto histórico de orixe medieval, segundo algunhas fontes, foi un porto baleeiro feito nun dos poucos entrantes propicios desta costa, a Enseada da Areosa. Entre moitas das cousas que se traían a este porto destaca a pesca do chicharro e da sardiña, e tamén do percebe. A este marisco dedícaselle unha das celebracións que máis xente atrae á vila: A “Festa do Percebe”.