Casa de Don Clemente
Tras adquirir unha considerable fortuna e a consecuente posición social, don Clemente López Méndez, nacido en Ribadeo, regresou á vila e adquiriu dous edificios anexos que en parte reconstrúe e acondiciona para crear unha soa vivenda. Reformar inmobles xa existentes é unha circunstancia pouco frecuente na arquitectura indiana.
Na configuración da fachada principal apréciase a medianeira divisoria de ambos edificios, cada un cunha composición propia. O conxunto edificado desenvólvese en tres plantas e unha baixo cuberta aproveitable grazas ás grandes bufardas que se elevan sobre a liña da cornixa.
O inmoble da esquerda presenta dous vans en cada planta, finalizados cun arco rebaixado e rodeados dun recercado pétreo. No segundo e terceiro piso, estes vans dan acceso a balcóns sostidos por ménsulas. O edificio da dereita presenta a singularidade de contar cun miradoiro que, deixando a planta baixa libre, repítese nos outros pisos ata exceder a liña da cornixa.
No baixo desta casa estivo durante moitos anos a farmacia Casariego, lugar de faladoiros rexentado por Manuel Alonso Casariego.
