Illa Pancha
É unha pequena illa, de pouco máis dunha hectárea, situada a uns dous quilómetros ao norte do centro de Ribadeo e separada das terras continentais por apenas 30 metros.
Grazas á súa localización e ó seu plano relevo foi escollida no século XIX para a construción dun faro. Iniciouse en 1857, proxectando unha edificación de planta cadrada de 127 m2, dispoñía de vivenda para o fareiro e no seu centro unha torre de 6,75 m de altura sobre a que se erguía o foco luminoso, a 8,8 m sobre o terreo e 24 m sobre a superficie do mar.
Entrou en servizo a finais de 1860, cun alcance de nove millas náuticas e estivo en servizo ata a posta en marcha do novo faro.
En 1980 iniciáronse as obras do novo faro, unha torre de tres metros de diámetro e 13 metros de altura, o que supón 28 m de altura sobre o nivel do mar e un alcance de 21 millas náuticas. A súa posta en servizo foi en outubro de 1983.
Co novo faro tamén se substituíu a antiga ponte de acceso á illa que estaba construído en madeira e ferro.
