Lavadoiro de Rinlo
O lavadoiro era o lugar, no río ou mesmo nun arroio, no que se lavaba a roupa a man sobre unha táboa ou pedra lisa. A maioría deles contaban cunha cuberta sostida por piares de pedra pero tamén os había abertos. Este consiste nunha gran pía de pedra de forma rectangular e coroada en tres das súas paredes por un perímetro de laxas inclinadas e ben pulidas para facilitar o lavado. Unha canle dirixe a auga á pía.
Aínda que algunhas casas, polas que transcorría próximo un río, podían contar cun propio, os lavadoiros de roupa adoitaban ser públicos e por tanto de uso colectivo. Nalgúns as mulleres lavaban a roupa unhas fronte ás outras, pero noutros as mulleres lavaban de lado. Nestes establecíanse regras de uso, como a de botar a auga sobre a roupa coa man dereita para así evitar botarse unhas a outras xabón e auga.
Os lavadoiros públicos, xunto coas fontes, eran os grandes lugares de convivencia e contacto social para as mulleres da época.
